Schweinsteiger aftur á skotskónum | Sjáðu markið

Bastian Schweinsteiger fer vel af stað með Chicago Fire eftir vistaskiptin frá Manchester United.

Schweinsteiger kom Chicago á bragðið í 3-0 sigri á New England Revolution í MLS-deildinni í Bandaríkjunum í gær.

Þýski miðjumaðurinn skoraði með góðu skoti á lokamínútu fyrri hálfleiks og kom Chicago í 1-0. Í seinni hálfleik bætti Nemanja Nikolic svo tveimur mörkum við og 3-0 sigur Chicago staðreynd.

Schweinsteiger er nú kominn með tvö mörk í þremur leikjum fyrir Chicago. Hann skoraði einnig í 2-2 jafntefli við Montreal Impact 1. apríl síðastliðinn, í sínum fyrsta leik fyrir félagið.

Schweinsteiger virðist smellpassa inn í lið Chicago sem hefur fengið sjö stig úr leikjunum þremur sem Þjóðverjinn hefur spilað fyrir það.

Chicago er í 3. sæti Austurdeildarinnar með 11 stig, tveimur stigum á eftir toppliði Columbus Crew.

Mark Schweinsteigers má sjá hér að neðan.