Stjóri Jóns Daða vildi ekki fara eftir nýrri stefnu og var rekinn

Jón Daði Böðvarsson, landsliðsframherji í fótbolta, fær nýjan knattspyrnustjóra á næstu dögum eða vikum hjá félagsliði sínu Wolverhampton Wanderers en Skotinn Paul Lambert var látinn fara í dag.

Lambert tók við Úlfunum í nóvember á síðasta ári og bjargaði liðinu frá falli eftir slæma byrjun þess. Það hafnaði í fimmtánda sæti og var ekki nálægt fallsvæðinu.

Sky Sports segist hafa heimildir fyrir því að Lambert sagði ekki upp heldur var hann ekki tilbúinn að vinna eftir nýrri stefnu félagsins í leikmannamálum sem ofurumboðsmaðurinn Jorge Mendes á að stýra.

Mendes er tengdur Fosun-fjárfestingahópnum sem á Úlfana en Lambert er þriðji stjórinn sem er látinn fara eftir að hann eignaðist félagið í júlí í fyrra.

Portúgalinn Nuno Espirito Santo er sterklega orðaður við starfið en hann sagði upp hjá Porto eftir að tímabilinu í Portúgal lauk.

Jón Daði spilaði 42 af 46 leikjum Úlfanna í ensku B-deildinni á síðustu leiktíð. Hann byrjaði 22 og kom 20 sinnum inn á sem varamaður. Selfyssingurinn skoraði þrjú mörk.