Wenger: Vill að stuðningsmennirnir standi þétt við bakið á liðinu

Arsene Wenger, knattspyrnustjóri Arsenal, var að vonum kátur eftir að hafa stýrt Skyttunum til sigurs á Chelsea í leiknum um Samfélagsskjöldinn á Wembley í dag.

Staðan að loknum venjulegum leiktíma var 1-1 en Arsenal vann vítaspyrnukeppnina 4-1. Skytturnar voru einum fleiri frá 80. mínútu eftir að Pedro var rekinn af velli.

„Ég veit ekki hvort þetta var rautt spjald eða ekki en á því augnabliki höfðum við yfirburði. Við áttum í erfiðleikum í byrjun seinni hálfleiks en eftir það stjórnuðum við leiknum. Við vorum alltaf hættulegir,“ sagði Wenger eftir leikinn.

Arsenal mætir Leicester City í fyrsta leik ensku úrvalsdeildarinnar á föstudaginn kemur. Wenger hvatti stuðningsmenn Arsenal til að standa með liðinu í vetur.

„Í ensku úrvalsdeildinni er hver einasti leikur bardagi, eins og í dag. Það er draumur að geta glatt stuðningsmennina. Ég vil að þeir standi þétt við bakið á liðinu því það skiptast eflaust á skin og skúrir í vetur,“ sagði Wenger.

„Við viljum vera sameinaðir og samheldnir í gegnum tímabilið.“