Jóhann Berg frá í um mánuð | Kósovó-leikurinn í hættu

Jóhann Berg Guðmundsson leikur ekki með Burnley næsta mánuðinn eða svo vegna meiðsla. Vefsíðan 433.is greinir frá.

Jóhann Berg meiddist í leik Burnley og Lincoln City í 16-liða úrslitum ensku bikarkeppninnar á laugardaginn og þurfti að fara af velli eftir 20 mínútur. Sem kunnugt er vann utandeildarlið Lincoln frækinn sigur í leiknum.

Jóhann Berg fór í myndatöku í dag og þar kom í ljós rifa á liðbandi í hné. Í samtali við 433.is segist Jóhann Berg stefna á að vera orðinn klár fyrir leikinn gegn Sunderland í ensku úrvalsdeildinni 18. mars.

Sex dögum síðar mætir Ísland og Kósovó í undankeppni HM og því er ekki ljóst hvort Jóhann Berg verði klár fyrir leikinn mikilvæga.

Þetta er í þriðja skipti sem Jóhann Berg meiðist eftir að hann kom til Burnley í sumar.

Landsliðsmaðurinn meiddist t.a.m. í leik gegn Manchester City 26. nóvember og var frá í mánuð.