Ragnar: Lækka verulega í launum

Ragnar Sigurðsson, varnarmaður íslenska landsliðsins, gerði í gær tveggja ára samning við enska B-deildarliðið Fulham líkt og greint var frá í gær.

Hann kemur til liðsins frá Krasnodar í Rússlandi þar sem hann hefur verið síðustu árin. Hann hefur hins vegar sagt lengi að hugurinn leiti til Englands og var hann orðaður við nokkur ensk lið eftir góða frammistöðu á EM í Frakklandi í sumar.

„Ég hef átt góðan tíma hjá Krasondar en nú tekur við nýr og spennandi kafli á ferli mínum,“ sagði Ragnar í viðtali við Morgunblaðið í dag. Enn fremur segir hann að forráðamenn rússneska liðsins hafi vitað að lítið vit hafi verið í því að neyða hann til að vera áfram hjá félaginu.

„Ég veit að ég kem til með að lækka verulega í launum með þessum félagaskiptum en ég er ekki í fótboltanum peninganna vegna. Ég vildi ólmur komast til Englands og ég get ekki beðið eftir því að byrja að spila þar,“ sagði Ragnar enn fremur við Morgunblaðið.