Zlatan bjargaði United | Sjáðu mörkin

Svíinn Zlatan Ibrahimovic tryggði Man. Utd öll þrjú stigin í kvöld er United sótti Crystal Palace heim á Selhurst Park.

Man. Utd komst yfir í uppbótartíma fyrri hálfleiks með mjög umdeildu marki. Zlatan virtist senda hann með hendinni á rangstæðan Paul Pogba sem skoraði.

Marcos Rojo, varnarmaður Man. Utd, var heppinn að vera ekki rekinn af velli í fyrri hálfleik eftir skrautlega tæklingu.

James McArthur jafnaði metin fyrir Palace eftir laglegan samleik hjá leikmönnum Palace.

United sótti nokkuð grimmt í kjölfarið og átti að fá vítaspyrnu er varnarmaður Palace sló boltann með hendi frá marki liðsins. Dómarinn dæmdi ekkert.

Zlatan Ibrahimovic kom United svo til bjargar skömmu fyrir leikslok. Fékk stungusendingu frá Pogba og lagði boltann smekklega í fjærhornið.

Hans áttunda mark í síðustu átta leikjum fyrir liðið. United er í sjötta sæti deildarinnar.