Írsk kona tísti frá ferð sinni í fóstureyðingu

Írsk kona tísti í beinni um ferð sína til Bretlands nú um helgina, en tilgangur ferðarinnar var að fara í fóstureyðingu. Fóstureyðingar eru ólöglegar á Írlandi, nema í sérstökum tilfellum, og talið er að á árunum 1980-2015 hafi yfir 165 þúsund konur ferðast frá Írlandi til Bretlands í því skyni að fara í fóstureyðingu. Sagt er frá málinu á fréttasíðu CNN.

Konan og samferðakona hennar sendu út tístin frá Twitter-aðgangnum @TwoWomenTravel, sem mætti þýða sem „Tvær konur ferðast,“ og lýstu þær verkefninu sem: „Tvær konur, ein aðgerð, 48 klukkustundir fjarri heimahögum.“ Flestum tístunum var beint að forsætisráðherra Írlands, Enda Kenny (@EndaKennyTD).

Fordæma aðgerðaleysi stjórnvalda

Konurnar tístu frá öllum stigum ferðalagsins, allt frá gráum og þungbúnum himni á flugbrautinni þegar lagt var af stað, og til blóðugs laks á hótelrúmi seinna um helgina. Á meðan önnur kvennanna gekkst undir fóstureyðinguna hélt ferðafélaginn twittersamfélaginu upplýstu.

„Þessi ferð er farin í sterkri samstöðu með öllum írsku systrum okkar sem farið hafa á undan okkur. Við stöndum með öllum konum sem hafa verið gerðar útlægar af @EndaKennyTD, fyrirrennurum hans og forsvarsmönnum.“

„Neyddar til að yfirgefa Írland. Rákumst á fleiri Íra á biðstofunni að bíða eftir ástvinum sínum.“

„Vinkona mín er komin út og allt í góðu. Aðgerðin tók stuttan tíma og starfsfólkið var mjög indælt. Ástarkveðjur til ykkar allra. @EndaKennyTD hefur brugðist okkur, það gerðuð þið ekki.“

Mikill stuðningur við konurnar

Tíst kvennanna vöktu fljótt mikla athygli og fengu þær stuðning úr ýmsum áttum, meðal annars frá breska grínistanum og spjallþáttastjórnandanum James Corden sem tísti, „Í dag ferðast tvær konur [@TwoWomenTravel], en þið eruð ekki einar í þessu. Svo margir eru með ykkur núna.“

Opinskáasta tístið kom svo á sunnudagsmorgun, en þá birtu þær mynd af blóðugu laki undir yfirskriftinni, „Hvorki fyrsta né síðasta blæðandi konan sem er við það að leggja af stað í langt ferðalag heim til sín.“

Fóstureyðingalöggjöf Írlands mjög umdeild

Miklar deilur hafa verið um fóstureyðingalöggjöf Írlands, en þjóðin er klofin í tvær fylkingar. Annars vegar þá sem vilja halda ströngum lögum Írlands um fóstureyðingar, og hins vegar þá sem telja mikilvægt að endurhugsa löggjöfina í takt við nýja tíma og sambærileg lög annarra landa.

Fóstureyðingalöggjöf Írlands er mun strangari en í Englandi, Skotlandi og Wales, en írsk kona sem gekkst undir ólöglega fóstureyðingu í apríl hlaut fyrir það þriggja mánaða skilorðsbundinn dóm.

Hægt er að lesa tíst kvennanna í glugganum hér fyrir neðan.

Tweets by TwoWomenTravel