Hörður Björgvin og félagar með þriðja sigurinn í röð | Öll úrslit dagsins

Hörður Björgvin Magnússon lék allar 90. mínúturnar í þriðja sigri Bristol City í röð en liðið er fimm stigum frá toppliði Huddersfield í Championship-deildinni.

Gestirnir frá Nottingham komust yfir í fyrri hálfleik en líkt og oft áður bjargaði Tammy Abraham, lánsmaður frá Chelsea, Bristol-mönnum.

Jafnaði hann metin á 65. mínútu og kom Bristol yfir á 68. mínútu en þetta var þriðji sigur Bristol City í röð.

Ragnar Sigurðsson bíður enn eftir fyrsta sigri sínum í deildinni með Fulham en Fulham þurfti að sætta sig við svekkjandi 1-2 tap gegn nágrönnunum í QPR í dag.

QPR komst yfir á 87. mínútu og reyndist það sigurmarkið þrátt fyrir að Fulham fengi vítaspyrnu á 94. mínútu.

Þá hefur Aston Villa sogast niður í botnbaráttuna í Championship-deildinni en Newcastle heldur áfram að berjast um toppsæti deildarinnar.

Þá töpuðu bæði Cardiff og Wolves leikjum sínum en hvorki Jón Daði Böðvarsson né Aron Einar Gunnarsson komu við sögu.