Tölfræðin sýnir að þetta eru mjög góðar fréttir fyrir Liverpool

Varnarmaðurinn Joel Matip er búinn að ná sér af meiðslunum og verður að öllum líkindum með Liverpool-liðinu á móti West Ham á Anfield á sunnudaginn kemur.

Liverpool fékk á sig fjögur mörk í tapi á móti Bournemouth um síðustu helgi og missti þá niður tveggja marka forystu eftir að hafa komist í bæði 2-0 og 3-1.

Liverpool hefur aðeins einu sinni fengið á sig meira en eitt mark í þeim leikjum sem Joel Matip hefur spilað með liðinu og Liverpool hefur enn ekki tapað leik þegar hann er í byrjunarliðinu.

Joel Matip var ekki með í síðasta leik vegna ökklameiðsla en Liverpool keypti þennan 25 ára gamla miðvörð frá Schalke í sumar.  Þetta voru ein bestu kaup Jürgen Klopp síðan að hann settist í stjórastólinn hjá Liverpool.

Tölfræðin sýnir það svart á hvítu að það eru mjög góðar fréttir fyrir Liverpool að Joel Matip sé leikfær á nýjan leik. Sky Sports tók tölurnar saman en þær koma svo sannarlega vel út fyrir Kamerúnmanninn.

Liverpool hefur fengið 2,45 stig að meðaltali í þeim 11 leikjum sem Joel Matip hefur spilað í ensku úrvalsdeildinni á tímabilinu en aðeins 1,00 stig að meðaltali í þremur leikjum án hans.

Liverpool-liðið hefur jafnframt aðeins fengið á sig 9 mörk í þeim 11 leikjum sem Matip hefur spilað (0,82 í leik) en mótherjar hafa skorað 9 sinnum hjá Liverpool í þeim þremur leikjum sem Matip hefur verið fjarverandi (3,00 í leik).

 

Liverpool með Joel Matip í ensku úrvalsdeildinni 2016-17:

8 sigrar og 3 jafntefli í 11 leikjum

9 mörk fengin á sig eða 0,82 í leik

Liverpool án Joel Matip í ensku úrvalsdeildinni 2016-17:

1 sigur og 2 töp í 2 leikjum

9 mörk fengin á sig eða 3,00 í leik