Mourinho vill fá fleiri mörk frá Rooney

José Mourinho, knattspyrnustjóri Manchester United, vill að Wayne Rooney, fyrirliði liðsins, skori fleiri mörk.

Rooney hefur ekki skorað í ensku úrvalsdeildinni frá því í 1-3 sigrinum á Bournemouth í 1. umferðinni og er aðeins kominn með þrjú mörk í öllum keppnum á tímabilinu.

„Sem sóknarmaður skorar Rooney vanalega meira. Við viljum fá fleiri mörk frá honum, sem og öðrum í liðinu,“ sagði Mourinho eftir 0-2 sigur Man Utd á Zorya Luhansk í Evrópudeildinni í gær.

Man Utd hefur aðeins skorað 19 mörk í ensku úrvalsdeildinni í vetur og Mourinho vill sjá sína menn vera duglegri að koma boltanum í mark andstæðinganna.

„Zlatan er búinn að vera duglegur að skora, sem er eðlilegt þar sem hann er okkar aðalframherji. En við viljum fá fleiri mörk frá hinum sóknarmönnunum í okkar liði,“ sagði Mourinho.

Man Utd er í 6. sæti ensku úrvalsdeildarinnar eftir 14 umferðir. Liðið fær Tottenham í heimsókn á sunnudaginn.