Southgate að klára fjögurra ára samning

Gareth Southgate verður þjálfari enska landsliðsins fram yfir EM 2020 ef marka má fréttir enskra fjölmiðla, líkt og Guardian.

Southgate fór í viðtal hjá forráðamönnum enska sambandsins á mánudag og var í raun eini maðurinn sem kom til greina í starfið að þessu sinni.

Southgate náði að heilla forystumenn enska sambandsins á fundinum og er nú með fjögurra ára tilboð á borðinu. Talið er að hann fái um eina og hálfa milljón punda, 211 milljónir króna, í árslaun.

Uppsagnarákvæði verður í samningi hans eftir HM 2018 en fyrsti leikur hans verður vináttulandsleikur gegn Þýskalandi þann 22. mars. England mætir svo Litháen í undankeppni HM 2018 fjórum dögum síðar.

Southgate tók tímabundið við þjálfun landsliðsins þegar Sam Allardyce hætti í kjölfar uppljóstrana um að hann hafi þáð greiðslu fyrir ráðleggingar um hvernig má komast fram hjá reglum enska sambandsins um félagaskipti.