Er Coutinho ökklabrotinn?

Philippe Coutinho, hinn stórskemmtilegi leikmaður Liverpool, gæti verið frá í lengri tíma eftir að hann meiddist í sigri Liverpool gegn Sunderland í dag.

Þessi 24 ára gamli Brasilíumaður var tæklaður af Didier Ndong í fyrri hálfleik og lá óvígur eftir, en hann var svo að lokum borinn af velli sárþjáður.

„Þetta leit ekki vel út. Hann engdist um af meiðslunum og veifaði bekknum strax. Þetta lítur út eins og mjög slæm meiðsli," sagði Martin Keown, fyrrum miðvörður Arsenal, við Final Score.

„Þetta gæti mögulega verið brot eða brákaður ökkli," en Coutinho hefur verið í frábæru formi að undanförnu; skorað fimm mörk og lagt upp sex í ensku úrvalsdeildinni hingað til.

Mynd af tæklingunni fylgir fréttinni.