Nasri: Guardiola setti leikmenn City í kynlífsbann

Samir Nasri fullyrðir að Pep Guardiola, stjóri Manchester City, hafi bannað leikmönnum sínum að stunda kynlíf eftir miðnætti.

Nasri er nú í láni hjá Sevilla í spænsku úrvalsdeildinni út núverandi tímabil en hann virtist ekki eiga samleið með Guardiola.

Nasri var í viðtali hjá L'Equpie du Soir á mánudagskvöld þar sem hann greindi frá kynlífsreglum spænska stjórans.

„Hann tilkynnti leikmönnum að þeir sem vilja stunda kynlíf á frídögum sínum skuli gera það fyrir miðnætti. Það væri nauðsynlegt að fá góðan svefn,“ sagði Nasri.

Sjá einnig: Nasri floginn til Spánar

„Hann sagði þetta líka við Lionel Messi sem hefur síðan þá verið laus við vöðvameiðsli, sem og Robert Lewandowski [hjá Bayern München] sem hann setti á bekkinn á sínum tíma. Hann kom honum í skilning um ákveðna hluti.“

Það var frægt í lok sumars er Guardiola sagði að Nasri hafi mætt of þungur til æfinga eftir sumarfrí.

„Þegar undirbúningstímabilið hófst var mér tilkynnt að ég þyrfti að vera 76 kíló,“ sagði hann.

„Hann var mjög passasamur með margt í eldhúsinu. Þegar ég kom til baka eftir sumarfrí var ég fjórum kílóum of þungur. Ef maður er 2,5 kílóum yfir réttri þyngd þá leyfir Guardiola manni ekki að æfa með leikmannahópnum.“