Mkhitaryan missir væntanlega af Manchester-slagnum

Henrikh Mkhitaryan missir að öllum líkindum af Manchester-slagnum eftir viku vegna meiðsla á læri.

Mkhitaryan meiddist þegar Armenar töpuðu 0-3 fyrir Tékkum í vináttulandsleik á miðvikudaginn.

Mkhitaryan er nú kominn aftur til Manchester þar sem hann verður í meðhöndlun hjá læknateymi Manchester United.

Búist er við því að Mkhitaryan verði frá í 10 daga sem útilokar hann frá þátttöku í Manchester-slagnum um næstu helgi. Mkhitaryan missir einnig af leik Armena og Dana í undankeppni HM 2018 á morgun.

Hinn 27 ára gamli Mkhitaryan hefur komið inn á sem varamaður í öllum þremur leikjum United í ensku úrvalsdeildinni á tímabilinu. Hann kom til enska liðsins frá Borussia Dortmund í sumar.