Guardiola tapaði fyrsta leiknum sínum með Manchester City

Pep Guardiola stýrði Manchester City í fyrsta sinn í kvöld en varð þá að sætta sig við tap á móti sínum gömlu lærisveinum í Bayern München á sínum gamla heimavelli Allianz Arena.

Bayern München vann leikinn 1-0 en bæði liðin voru án lykilmanna sem hafa ekki skilað sér til baka eftir Evrópukeppnina í Frakklandi og Ameríkukeppnina í Bandaríkjunum.

Pep Guardiola var sem dæmi með tólf leikmenn úr unglingaliði félagsins í hópnum. Hann hætti sem þjálfari Bayern München fyrir aðeins tveimur mánuðum síðan en ítalinn Carlo Ancelotti tók við starfi hans.

Eina mark leiksins skoraði hinn tvítugi Erdal Ozturk skoraði á 76. mínútu með skoti sem fór af varnarmanninum Gäel Clichy og í mark Manchester City. Ozturk kom til Bayern frá Hoffenheim.

Nýi maðurinn Oleksandr Zinchenko spilaði fyrri hálfleik en þeir Ilkay Gundogan og Nolito komu ekkert við sögu í leiknum.

Næst á dagskrá hjá Manchester City er að ferðast til Kína þar sem næsti leikur liðsins verður á móti Manchester United á mánudaginn. Sergio Aguero, David Silva, Nolito, Raheem Sterling og Joe Hart verða allir með í þeirri ferð.