Fjórir Brighton-menn fóru meiddir af velli og Wednesday vann 2-0

Sheffield Wednesday er í fínum málum eftir fyrri undanúrslitaleik sinn á móti Brighton & Hove Albion í umspili um laust sæti í ensku úrvalsdeildinni.

Sheffield Wednesday vann 2-0 á heimavelli sínum í kvöld og er því með tveggja marka forskot fyrir seinni leikinn á heimavelli Brighton & Hove Albion.

Sheffield Wednesday skoraði mörkin sín í sitthvorum hálfleiknum en liðið var manni fleiri síðasta hálftíma leiksins þegar fjórði leikmaður Brighton meiddist.

Sheffield Wednesday endaði í sjötta sæti deildarinnar og var síðasta liðið inn í úrslitakeppnina en Brighton rétt missti af öðru af tveimur efstu sætunum á lokakaflanum.

Það bjuggust því flestir við að Brighton væri að fara áfram en Sheffield Wednesday liðið hefur verið á miklu skriði síðan í desember og enginn óskamótherji fyrir Brighton.

Það hjálpaði heldur ekki Brighton í kvöld að liðið missti fjóra menn af velli vegna meiðsla. Þegar sá síðasta meiddist voru skiptingarnar búnar og því þurftu leikmenn Brighton að spila tíu á móti ellefu síðasta hálftíma leiksins.

Ross Wallace skoraði fyrra markið með glæsilegu langskoti á lokamínútu fyrri hálfleiksins en fyrr í hálfleiknum hafði Fernando Forestieri skorað mark sem var dæmt af og voru heimamenn langt frá því að vera sammála um það.

Kieran Lee skoraði seinna markið á 73. mínútu eftir stoðsendingu frá Fernando Forestieri.

Sigurvegarinn úr einvígi Sheffield Wednesday og Brighton & Hove Albion mætir sigurvegaranum úr einvígi Derby County og Hull City en fyrri leikur þeirra er á morgun. Seinni leikurinn Wednesday og Brighton fer fram á Falmer-leikvanginum í Brighton á Annan í Hvítasunnu.