Þekkir sjö samkynhneigða leikmenn í ensku úrvalsdeildinni

Breska sjónvarpskonana og fyrirsætan Amal Fashanu segist þekkja sjö samkynhneigða leikmenn sem spila í ensku úrvalsdeildinni. Allir eru þeir fastir í grimmum heimi því þeir geta ekki komið út úr skápnum, að hennar sögn.

Amal Fashanu var frænka Justins Fashanu, fyrsta leikmannsins sem keyptur var fyrir milljón pund á Englandi. Fashanu spilaði lengst af með Norwich og Nottingham Forest, en ferill hans stóð yfir frá 1978-1997. Hann kom út úr skápnum árið 1991 en tók eigið líf sjö árum síðar.

Hann er aðeins annar tveggja leikmanna sem komið hafa út úr skápnum á meðan þeir spiluðu, en hinn er Bandaríkjamaðurinn Robbie Rogers sem opinberaði samkynhneigð sína árið 2013. Rogers spilaði með Leeds á Englandi en er nú leikmaður LA Galaxy í MLS-deildinni.

Vill ekki vera fótboltamaður

„Ég sjálf þekki sjö samkynhneigða leikmenn [í úrvalsdeildinni]. Ég muna aldrei segja hverjir þeir eru. Maður vill vera heiðarlegur og hjálpa þeim en ég bara get það ekki. Fótboltaheimurinn er svo grimmur,“ segir Amal Fashanu í viðtali við BBC.

Amal segir stóran hluta vandamálsins vera hversu miklu sviðsljósi fótboltamenn eru í. Og ekki bara þeir sjálfir heldur fjölskyldur þeirra. „Ég vil ekki einu sinni ímynda mér hvernig það er að vera fótboltamaður,“ segir hún.

Frændi hennar Justin Fashanu tók eigið líf þegar lögreglan í Maryland í Bandaríkjunum yfirheyrði hann fyrir að fremja kynferðisglæp á 17 ára dreng.

Fashanu hafði þá búið í Bandaríkjunum í tvö ár þar sem hann spilaði síðustu ár ferilsins. Fashanu hélt alltaf fram sakleysi sínu, en í bréfi sem hann skildi eftir sig sagði Fashanu að kynlíf hans og drengsins var stundað með fullu samþykki beggja aðila.

Amal Fashanu gerði heimildamyndina Britain's Gay Footballers árið 2012.