Bosníumenn sækja formlega um aðild að ESB

Stjórnvöld í Bosníu hafa formlega sótt um aðild að Evrópusambandinu. Stjórnin segist ætla að hraða nauðsynlegum umbótum með það að markmiði að fá stöðu umsóknarríkis á næsta ári. 

Dragan Covic, forseti landsins, afhenti Bert Koenders, utanríkisráðherra Hollands,  umsóknina í Brussel í morgun, en Holland fer nú með formennsku í ráðherraráðinu.

Bosnía og ESB undirrituðu stöðugleikasamning árið 2008, þrettán árum eftir lok stríðsins á Balkanskaga.

Eftir stríðið hafa deilur staðið milli þjóðernishópa í landinu og hafa óleyst vandamál frá stríðsárunum staðið nauðsynlegum umbótum fyrir þrifum.

Fyrrverandi ríki Júgóslavíu, Slóvenía og Króatía, eru nú þegar aðilar að ESB. Þau ríki sem nú eru með stöðu umsóknarríkis ESB eru Albanía, Makedónía, Svartfjallaland, Serbía og Tyrkland.