Pardew mun skrifa undir nýjan samning eftir tímabilið

Alan Pardew, knattspyrnustjóri Crystal Palace, hefur nú staðfest að hann muni skrifa undir nýjan samning við stjórnendur félagsins eftir tímabilið.

Crystal Palace vann góðan sigur á Stoke 2-1 í ensku úrvalsdeildinni í gær og er liðið komið yfir 40 stiga múrinn í deildinni.

Dwight Gayle skoraði bæði mörk liðsins en þetta var samt sem áður bara annar sigur liðsins í síðustu tuttugu deildarleikjum Palace og vildi Pardew ekki skrifa undir nýjan samning við félagið fyrr en staðfest væri að liðið myndi leika í efstu deild á næsta tímabili.

Crystal Palace er komið í úrslitaleikinn í enska bikarnum og mætir það Manchester United þar.