Mahrez hafnar nýjum samning og vill yfirgefa Leicester

Riyad Mahrez, einn besti leikmaður Leicester er liðið hampaði óvænt enska meistaratitlinum á síðasta tímabili, vill yfirgefa félagið og mun hafna samningnum sem félagið býður honum á næstu dögum.

Þetta kemur fram í enskum miðlum í dag en Mahrez sem var valinn besti leikmaður tímabilsins í fyrra af leikmönnum er eftirsóttur af öllum stærstu klúbbum Evrópu.

Mahrez á þrjú ár eftir af samning sínum sem hann skrifaði undir síðasta sumar en hann hefur beðið umboðsmenn sína um að finna fyrir sig nýtt félag í sumar þrátt fyrir að Leicester hafi ætlað að þrefalda launin hans eftir frábært tímabil.

Er þetta annað áfall fyrir Leicester-menn en í gær bárust fréttir um að franski landsliðsmaðurinn N’Golo Kanté væri á förum frá félaginu eftir að samþykkt var tilboð frá Chelsea.