Jesus kemur til City sem sá besti

Gabriel Jesus, verðandi leikmaður Manchester City, hefur verið útnefndur besti leikmaðurinn í Brasilíu árið 2016.

Þessi 19 ára gamli framherji hjálpaði sínu liði Palmeiras að verða meistari í heimalandinu í fyrsta sinn í 22 ár en hann skoraði tólf mörk á tímabilinu.

Þá átti hann stórgott ár með brasilíska landsliðinu sem er í efsta sæti í undankeppni HM 2018 í Suður-Ameríku auk þess sem hann varð Ólympíumeistari með U23 ára liðinu í Ríó í sumar.

Jesus var áður búinn að hljóta Bola de Ouro-verðlaunin sem besti leikmaðurinn í brasilísku úrvalsdeildinni en þann titil hafa menn á borð við Ronaldhino, Neymar og Carlos Tévez fengið.

Það var í byrjun ágúst sem Manchester City gekk frá kaupum á Brassanum unga en leyfði honum að klára tímabilið með Palmeiras. Hann verður löglegur með City-liðinu í byrjun nýs árs.

„Þetta er mikill heiður en ég á þetta liðsfélögum mínum að þakka. Mér hefði ekki getað dreymt um að vinna þessi verðlaun. Ég er mjög ánægður,“ sagði Gabriel Jesus er hann tók við viðurkenningunni.