Aston Villa nældi í stig gegn Manchester City í fyrsta leik Garde

Aston Villa krækti í eitt stig í fyrsta leik félagsins undir stjórn hins franska Rémi Garde í 0-0 jafntefli gegn toppliði Manchester City en gestirnir voru óheppnir að ná ekki að stela sigrinum á lokamínútum leiksins.

Garde tók við liði Aston Villa á dögunum af Tim Sherwood en liðið var búið að tapa sjö leikjum í röð og aðeins næla í eitt stig í síðustu tíu leikjum liðsins. Garde gerði sex breytingar á byrjunarliði Aston Villa frá 1-3 tapinu gegn Tottenham á mánudaginn og var allt annað að sjá til liðsins.

Raheem Sterling fékk besta færi fyrri hálfleiksins undir lokin þegar hann fékk frábært skallafæri af stuttu færi en skalli hans fór beint í hausinn á Brad Guzan í marki Aston Villa sem skallaði boltann yfir í horn.

Manuel Pellegrini reyndi að auka sóknarþungann í seinni hálfleik og setti meðal annars Fabian Delph, fyrrum leikmann Aston Villa inná en besta færi Manchester City féll fyrir Fernando sem skallaði í þverslánna af stuttu færi í uppbótartíma.

Leikmenn Manchester City sóttu af miklum ákafa og áttu eflaust skilið að skora sigurmarkið en þeim tókst ekki að koma boltanum framhjá Guzan og lauk leiknum því með markalausu jafntefli.

Manchester City situr í toppsæti ensku úrvalsdeildarinnar í bili en Arsenal getur komist upp fyrir Manchester City með sigri á Tottenham í leik liðanna sem hefst klukkan 16.00.