Corbyn sigurstranglegastur

Formannskjör í verkamannaflokki Bretlands stendur nú yfir, en það hófst á föstudaginn. Kjörinu lýkur tíunda september næstkomandi og verða úrslitin kynnt tveimur dögum síðar.

Kjörið fer fram í kjölfar afsagnar Eds Milibands, fyrrverandi formanns, sem sagði af sér vegna ósigurs flokksins í þingkosningunum í maí síðastliðnum. Á meðan beðið er eftir nýjum formanni gegnir varaformaðurinn, Harriet Harman, formannsembættinu.

Frambjóðendurnir sem gefa kost á sér til formanns eru fjórir; Andy Burnham, Jeremy Corbyn, Yvette Cooper og Liz Kendall. Þegar fylgismælingar hófust þótti Burnham vinsælastur, en nafn Corbyn var hvergi að finna í skoðanakönnunum. Nú mælist hann hins vegar með 46 prósenta fylgi, rúmlega tvöfalt meira en Burnham.

Hugmyndir Corbyns hafa ekki fengið mikinn hljómgrunn á síðustu árum en hann er ötull talsmaður félagshyggju og þjóðnýtingar. Frá því Tony Blair gegndi formannsembætti hefur flokkurinn fært sig lengra til hægri en nú virðist sem margir hafi fengið nóg og vilji hverfa aftur til vinstri.

Frá því kosningabaráttan hófst hefur fjöldi þeirra sem eru á kjörskrá farið úr 200.000 manns og upp í rúm 610.000. Á síðasta degi skráninga einum bættust við um 160.000 manns.

Stóraukinn fjöldi kjósenda er umdeildur. Þingmaður flokksins, John Mann, kallaði eftir því að kosningarnar yrðu settar í salt eftir að blaðamaðurinn Toby Young skrifaði grein í dagblaðið Telegraph þar sem hann hvatti kjósendur Íhaldsflokksins til að skrá sig í Verkamannaflokkinn og kjósa Corbyn. Young, líkt og fjöldi stjórnmálaskýrenda í Bretlandi, telur Corbyn ólíklegastan til að færa flokknum sigur í næstu þingkosningum.

Burnham og Kendall hafa hins vegar sagt opinberlega að engar sannanir séu fyrir því að aðrir flokkar séu að reyna að hafa áhrif á útkomu formannskjörsins. Þá hefur Corbyn sjálfur sagst einungis vilja atkvæði „alvöru stuðningsmanna flokksins“.

Corbyn nýtur hins vegar gífurlegra vinsælda sem má að miklu leyti rekja til þess að hann talar gegn hinum ríkustu og fyrir auknum jöfnuði. Auk þess leggur hann megináherslu á að ekki skuli skera niður í ríkisrekstri.

Vinsældirnar hafa komið Corbyn í opna skjöldu en hann hugðist í fyrstu ekki einu sinni bjóða sig fram. „Ég býð mig fram í ljósi yfirþyrmandi óska meðlima Verkamannaflokksins sem vildu sjá fjölbreyttari hóp frambjóðenda og alvöru umræðu um framtíð flokksins. Ég býð mig fram til að ljá flokksmönnum rödd,“ sagði Corbyn þegar hann tilkynnti framboð sitt í júní.