Wenger og Vardy bestir í október

Arsene Wenger, knattspyrnustjóri Arsenal, hefur verið útnefndur stjóri október mánaðar í ensku úrvalsdeildinni.

Wenger stýrði Arsenal til sigurs í öllum fjórum deildarleikjum liðsins í mánuðinum, en hann hófst á 3-0 stórsigri á Manchester United.

Því fylgdu sigrar á nýliðum Watford og svo Everton og Swansea, en þessi sigurganga hjálpaði Arsenal að ná Manchester City að stigum á toppnum.

„Það er gott að fá þessa viðurkenningu því þetta minnir mann á að þrátt fyrir tapið gegn Bayern stóðum við okkur vel í síðasta mánuði,“ segir Arsene Wenger.

„Nú reynir á að halda þessu skriði gangandi á næstu mánuðum. Það viljum við reyna að gera.“

Aðspurður um sigurinn flotta á Manchester United segir Frakkinn: „Hann stóð upp úr því það eru ekki margir leikir á ferlinum þar sem gjörsamlega allt smellur saman á fyrstu 20 mínútunum. Þetta var þannig leikur.“

Jamie Vardy var á sama tíma útnefndur leikmaður mánaðarins í ensku úrvalsdeildinni en hann skoraði í öllum fjórum leikjum Leicester í mánuðinum og setti í heildina fimm mörk í fjórum leikjum.

Vardy er búinn að skora í níu leikjum í röð í deildinni og getur jafnað met Ruud van Nistelrooy eftir landleikjahléið með því að skora í tíunda leiknum í röð.