Real Madrid vaktar David De Gea

Spænska stórliðið Real Madrid fylgist vel með stöðu spænska markvarðarins David De Gea hjá Manchester United.

De Gea á 18 mánuði eftir af samningi sínum við enska stórliðið og er talið að Real Madrid sé tilbúið að bjóða 30 milljónir punda í markvörðinn í sumar.

Louis van Gaal knattspyrnustjóri Manchester United er sannfærður um að De Gea framlengi samning sinn við félagið. „Það held ég já,“ sagði Van Gaal.

„Ég held að ekkert komi í veg  fyrir að hann skrifi undir. Hann er fastamaður í liðinu og þegar þú ert það þá ertu líklega bestur. Stjórinn er mjög ánægður ef fastamaðurinn verður áfram með liðinu. Þannig hefur það alltaf verið,“ sagði Van Gaal.