Leverkusen gæti neyðst til að selja Calhanoglu

Louis van Gaal, stjóri Manchester United, er sagður hafa fylgst náið með tyrkneska miðjumanninum Hakan Calhanoglu, leikmanni Leverkusen, síðustu mánuðina.

Þýska blaðið Bild fullyrðir í dag að United sé að undirbúa tilboð í tyrkneska landsliðsmanninn og að félagið sé reiðubúið að borga 40 milljónir punda fyrir kappann.

Calhanoglu er 21 árs og fæddur og uppalinn í Þýskalandi. Stjórnarformaður Leverkusen viðurkenndi í dag að félagið gæti neyðst til að selja kappann ef stórt tilboð berst.

„Við viljum halda Hakan en við höfum okkar viðmið í þessum efnum,“ sagði Michael Schade.

Calhanoglu hefur einnig verið orðaður við bæði Barcelona og Atletico Madrid.