Charlton heldur áfram að tapa | Aron búinn að vinna sér sæti í byrjunarliði Cardiff

Það gengur hvorki né rekur hjá Jóhanni Berg Guðmundssyni og félögum í Charlton Athletic í ensku B-deildinni en í dag töpuðu þeir 3-0 fyrir Middlesbrough á útivelli.

Þetta var fjórða tap Charlton í röð en liðið er í 22. sæti deildarinnar með 10 stig eftir 14 umferðir.

Jóhann Berg lék allan leikinn í dag en hann hefur skorað tvö mörk í 13 deildarleikjum fyrir Charlton á tímabilinu.

Aron Einar Gunnarsson var þriðja leikinn í röð í byrjunarliði Cardiff City þegar liðið gerði markalaust jafntefli við Ipswich Town á Portman Road.

Landsliðsfyrirliðinn lék lítið framan af tímabilinu en hefur unnið sér sæti í byrjunarliði Cardiff á nýjan leik.

Cardiff er í 9. sæti deildarinnar með 22 stig.