Hættir að flytja fréttir af Leeds til að hjálpa félaginu

Magnus Sveen, fréttamaður TV 2 í Noregi, hefur ákveðið að hætta að flytja fréttir af gengi Leeds United í Englandi í þeirri von að það komi félaginu til góðs.

Sveen segir í sinni síðustu frétt, sem má sjá með enskum texta hér, að hjátrú hafi ávallt verið stór hluti í lífi knattspyrnuáhugamanna. Hann hafi til dæmis gleymt Leeds-treyjunni sinni þegar hann sá Tony Yaboah skora stórkostlegt mark fyrir Leeds gegn Wimbledon árið 1995. Síðan þá hafi hann aldrei klæðst Leeds-treyju á leikjum liðsins.

Sveen byrjaði að flytja fréttir af Leeds á TV 2 árið 2001 en þá var félagið í ensku úrvalsdeildinni og spilað í undanúrslitum Meistaradeildar Evrópu. En stuttu síðar kom hrunið og félagið hefur verið í miklu basli síðan þá.

Hann hafi því ákveðið að hætta störfum sínum á sjónvarpstöðinni í þeirri von að „bölvun“ félagsins verði aflétt.