Uppreisnarleiðtogi vill ekki vopnahlé

„Af okkar hálfu verða ekki gerðar neinar tilraunir til viðræðna um vopnahlé,“ sagði Alexander Sakhartsjenkó, einn af helstu leiðtogum uppreisnarmanna í austanverðri Úkraínu.

Hann sagði uppreisnarmenn vera í sókn þessa dagana og hafa því engan hag af friðarviðræðunum. Þeir myndu halda áfram að reyna að ná stærra svæði á sitt vald. Donetsk-borg væri þegar á valdi þeirra og nánast allt Donetsk-hérað sömuleiðis.

Úkraínski herinn yfirgaf í vikunni flugstöðvarbygginguna í Donetsk eftir hörð átök þar, en uppreisnarmenn höfðu lengi haft flugvöllinn sjálfan á sínu valdi. Uppreisnarmenn segja samt að stjórnarherinn sé enn að gera árásir á flugvöllinn.

Þrettán almennir borgarar létu lífið á fimmtudag þegar sprengjuflaug sprakk á strætisvagnastöð þar í miðborginni. Uppreisnarmenn saka stjórnarherinn um að bera ábyrgð á þessari árás, og Vladimí Pútín Rússlandsforseti hefur tekið undir það. Atlantshafsbandalagið segir margt benda til þess að hörð átök séu í uppsiglingu í austanverðri Úkraínu.

Sameinuðu þjóðirnar segja að átökin þar hafi til þessa kostað meira en fimm þúsund manns lífið.