Man. City með fjóra af fimm markahæstu leikmönnum ársins 2014

Það hefur ekki gengið illa hjá Manchester City að skora mörk í ensku úrvalsdeildinni í fótbolta undanfarin misseri. Á síðasta ári var liðið með þrjá af fimm markahæstu leikmönnum úrvalsdeildarinnar, ef miðað er við 1. janúar til 31. desember.

Argentínumaðurinn Sergio Agüero var í öðru sæti með 18 mörk, Fílabeinsstrendingurinn Yaya Touré í þriðja sæti með 17 mörk og Bosníumaúrinn Edin Dzeko í fimmta sæti með 14 mörk.

Eini maðurinn sem skoraði meira en Agüero var annar Fílabeinsstrendingur, Wilfried Bony, leikmaður velska liðsins Swansea. Hann skoraði 20 mörk í úrvalsdeildinni á árinu 2014.

Eins og kom fram í gær festi Manchester City endanlega kaup á Bony og borgar Swansea 25 milljónir punda fyrir leikmanninn. Sú upphæð getur hækkað upp í 28 milljónir punda með árangurstengdum greiðslum.

Englandsmeistararnir eru búnir að skora 45 mörk í fyrstu 21 leik tímabilsins í ensku úrvalsdeildinni og ættu að geta bætt við fleiri mörkum með kvartett í liðinu sem skoraði samtals 69 mörk á síðasta ári.

Wilfried Bony spilar ekki sinn fyrsta leik fyrir Manchester City fyrr en í febrúar, en hann er staddur í Miðbaugs-Gíneu þar sem Afríkukeppnin í fótbolta er að hefjast.

Mörk í úrvalsdeildinni á árinu 2014:

Wilfried Bony, Swansea - 20

Sergio Agüero, Man. City - 18

Yaya Touré, Man. City - 17

Wayne Rooney, Man. Utd - 16

Edin Dzeko, Man. City - 14