Félagsmálaráðherra segir áhuga unglinga á útlöndum jákvæðar fréttir

Eygló Harðardóttir, félagsmálaráðherra, fagnar því að íslenskir unglingar vilji í æ ríkari mæli flytja til útlanda.

Vísir greindi frá nýrri rannsókn Háskólans á Akureyri sem leiddi í ljós að sífellt fleiri íslenskir unglingar vilja helst búa erlendis. Fyrir hrun árin 2003 og 2007 vildi um þriðjungur íslenskra unglinga helst búa erlendis en réttur helmingur þeirra árið 2015.

Í athugasemd við frétt Vísis segir félagsmálaráðherrann niðurstöðurnar vera gleðiefni.

„Þetta finnst mér jákvæðar fréttir, - að unga fólkið okkar vill fara erlendis, læra, vinna og afla sér nýrrar þekkingar og reynslu fyrir samfélag okkar,” segir Eygló og bætir því við að hún hafi sjálf búið og starfað á erlendri grundu.

Þá hafi hún „unnið við það að hjálpa ungu fólki bæði að koma hingað og að fara erlendis til vinnu og annarra ævintýra, og séð hvað sú reynsla hefur gefið því mikið,” eins og hún kemst að orði í færslunni.

Hún leggur til að útlandaþrá unglinganna verði höfð að leiðarljósi við fyrirhugaða endurskoðun námslánakerfisins, sem Illugi Gunnarsson sagði á dögunum í samtali við Fréttablaðið að væri á döfinni – ekki síst í ljósi þess að hún helst í hendur við ályktun Framsóknarflokksins sem samþykkt var á síðasta flokksþingi og lesa má í færslu hennar hér að neðan.

Þetta finnst mér jákvæðar fréttir, - að unga fólkið okkar vill fara erlendis, læra, vinna og afla sér nýrrar þekkingar...

Posted by Eygló Harðardóttir on Friday, 17 July 2015

Haft er eftir Þóroddi Bjarnasyni prófessor, sem hafði yfirumsjón með rannsókninni, að mikilvægt sé að taka viðhorfsbreytinguna sem birtist í niðurstöðum rannsóknarinnar alvarlega. Hann telur þó ekki sérstaka ástæðu til að óttast aðdráttarafl annarra landa. „Það er hins vegar okkar sem eldri erum að skapa hér samfélag sem gott er að flytja til, hvort fólk á hér rætur eða ekki. Í þessari alþjóðlegu samkeppni er fjölbreytni búsetukosta í stærri og smærri byggðarlögum lykilatriði þannig að sem flestir vilji snúa heim aftur með nýja þekkingu og reynslu, og ekki síður til að fólk með rætur í öðrum byggðarlögum eða öðrum löndum geti fundið hér framtíðarheimili, hvort sem það kemur hingað á eigin vegum eða til dæmis með maka á heimleið,“ segir Þóroddur.