Fagráðið harmar brott­hvarf Hildi­gunnar

Fagráðið sendi frá sér ályktun um brotthvarf Hildigunnar í dag. Fjallað er um ályktunina í Vikublaðinu.

Þar kemur einnig fram að fagráðið telji að farsælast hefði verið ef Hildigunnur hefði setið áfram. Staða forstjóra spítalans var auglýst í lok síðasta mánaðar. Töluvert hefur verið fjallað um erfiða stöðu spítalans undanfarið í tengslum við uppsögn ferliverksamninga, myglu og lokun endurhæfingardeildar spítalans.

„Starfsemi Sjúkrahússins hefur verið að ganga í gegnum viðkvæmt tímabil af ýmsum orsökum t.d. vegna kröfu ráðuneytis að segja upp ferliverkum lækna, myglu í húsnæði og aðstöðu margra deilda sem krefjast flutninga flókins búnaðar og starfsemi ásamt mikilli úrbótavinnu, áskorana tengdum nýjum kjarasamningum lækna, mönnunarvanda lækna, hjúkrunarfræðinga og fleiri heilbrigðisstétta og skorts á fjármögnun í takt við verkefni,“ segir í ályktun fagráðsins.

Þau telja að eðlilegra hefði verið að halda stöðugleika í yfirstjórn við þessar aðstæður.

„Fagráð SAk þakkar Hildigunni fyrir vel unnin störf og samstarf á undanförnum árum,“ segir að lokum í ályktuninni.

Umsóknarfrestur um stöðu forstjóra spítalans er til 23. mars. Í auglýsingu kom fram að skipað yrði í stöðuna til fimm ára, frá 1. júní 2026. Sjúkrahúsið á Akureyri er annað stærsta sjúkrahús landsins og lögum samkvæmt varasjúkrahús Landspítalans. Að jafnaði eru tæplega 700 manns starfandi á SAk.

Fram kom í frétt á vef Vísis við lok síðasta mánaðar að Torfi Fjalar Jónasson, hjartalæknir og eiginmaður Ölmu Möller heilbrigðisráðherra, hefði lagt fram vantrauststillögu á fundi læknaráðsins í október en síðan dregið hana til baka. Torfi vísaði á bug ásökunum um að hafa átt í átökum eða árekstrum við Hildigunni.

Tilefni fyrirspurnar fréttastofu til Torfa Fjalars um árekstra við Hildigunni var viðtal við Ingibjörgu Isaksen, þingflokksformann Framsóknarflokksins, í Bítinu á Bylgjunni 20. febrúar. Þar gaf Ingibjörg í skyn að Torfi hefði átt í einhverjum átökum eða árekstrum við Hildigunni áður en hún sagði svo af sér í kjölfar þess að tilkynnt hafði verið að staðan yrði auglýst.