Keyrir Chile-hraðlestin yfir Perú í kvöld?

Fyrri undanúrslitaleikurinn í Suður-Ameríkukeppninni fer fram í kvöld þegar Chile og Perú mætast á Estadio Nacional í Santíagó, höfuðborg Chile.

Chile hefur leikið liða best á mótinu til þessa en heimamenn hafa ekki tapað leik og skorað flest mörk allra liða, eða 11 talsins.

Chile-menn fóru í gegnum mjög erfiðan leik gegn Úrúgvæ í 8-liða úrslitum sem dró dilk á eftir sér en þrír Úrúgvæar fengu að líta rauða spjaldið í leiknum; leikmennirnir Edinson Cavani og Jorge Fucile og þjálfarinn Oscar Tabarez.

Sjá einnig: Jara potaði ekki bara í rassinn á Cavani heldur talaði líka illa um föður hans.

Sá fyrstnefndi var rekinn af velli fyrir að ýta við Gonzalo Jara, varnarmanni Chile, en á sjónvarpsupptökum sást Jara troða putta upp í afturenda Cavanis, auk þess sem hann á að hafa viðhaft ófögur orð um föður framherjans sem varð 19 ára gömlum dreng að bana í umferðarslysi í síðustu viku.

Þrátt fyrir að hafa náð að æsa Cavani upp og fiska hann út af sleppur Jara ekki með rassapotið. Hann hefur verið úrskurðaður í þriggja leikja bann og kemur því ekki meira við sögu í Suður-Ameríkukeppninni en Chile á aðeins eftir að leika tvo leiki.

Sjá einnig: Puttalingurinn þarf líklega að finna sér nýtt lið.

Chile hefur aldrei tekist að vinna Suður-Ameríkukeppnina en síleska liðið hefur fjórum sinnum endað í 2. sæti keppninnar og fimm sinnum í því þriðja. Chile féll út í 8-liða úrslitum í síðustu keppni, fyrir fjórum árum.

Perú hefur hins vegar tvívegis unnið keppnina, á heimavelli 1939 og 1975 þegar Teófilo Cubillas fór fyrir liðinu en hann var í hópi bestu leikmanna heims á sínum tíma.

Perú náði góðum árangri í Argentínu fyrir fjórum árum og náði þar í bronsverðlaun eftir 4-1 sigur á Venesúela í leiknum um 3. sætið. Paolo Guerrero skoraði þrennu í leiknum en hann hefur einnig gert þrennu í keppninni í ár, gegn Bólivíu í 8-liða úrslitunum í síðustu viku.

Chile og Perú hafa mæst 18 sinnum í Suður-Ameríkukeppninni og útkoman gæti ekki verið jafnari. Liðin hafa unnið sex leiki hvort og sex sinnum hafa þau gert jafntefli.

Leikur Chile og Perú hefst klukkan 23:30 í kvöld en sigurvegarinn mætir annað hvort Argentínu eða Paragvæ í úrslitaleiknum 4. júlí.