Puttalingurinn þarf líklega að finna sér nýtt lið

Líklegt þykir að þýska úrvalsdeildarliðið Mainz 05 muni láta síleska landsliðsmanninn Gonzalo Jara fara frá félaginu vegna atviks sem átti sér stað í leik Chile og Úrúgvæ í 8-liða úrslitum Suður-Ameríkukeppninnar í fyrradag.

Leikurinn var gríðarlega harður en áður en yfir lauk höfðu tveir leikmenn Úrúgvæ, sem og þjálfari liðsins, verið reknir af velli með rautt spjald.

Edinson Cavani varð fyrstur til að fá reisupassann á 63. mínútu þegar hann sló í andlit Jara sem henti sér í grasið með miklum tilþrifum.

Á sjónvarpsupptökum sást hins vegar að Jara var ekki alsaklaus en þær sýna þegar hann treður fingri upp í afturenda Cavani sem brást ókvæða við.

Atvikið hefur vakið mikla athygli en margir hafa fordæmt hegðun Jara sem virðist ætla að draga dilk á eftir sér.

„Hann veit að hann getur farið ef það kemur tilboð í hann,“ sagði íþróttastjóri Mainz, Christian Heidel, í samtali við Bild.

„Við líðum ekki svona. Það er ekki einungis fingraatvikið sem er truflandi heldur er það sem gerist í kjölfar þess sem gerir mig reiðan. Ég hata leikaraskap meira en allt,“ bætti Heidel við en svo virðist sem dagar Jara hjá þýska liðinu séu taldir.

Chile vann umræddan leik 1-0 og komst þar með í undanúrslit Suður-Ameríkukeppninnar í fyrsta sinn í 16 ár. Óvíst er hvort Jara verði með liðinu í undanúrslitaleiknum gegn Perú en samkvæmt sumum fjölmiðlum verður hann settur í bann á næstunni og útilokaður frá frekari þátttöku í keppninni.