Valdes berst fyrir frelsinu

Victor Valdes, einn markvarða Manchester United, segist berjast nú fyrir frelsi sínu en fyrir löngu varð ljóst að hann á sér enga framtíð hjá félaginu.

Louis van Gaal, stjóri United, hefur engan áhuga á að nota Valdes og sakaði hann um að neita að spila fyrir U-21 lið United á sínum tíma. Valdes sagði að það hefði verið alrangt hjá stjóranum.

Valdes, sem varði mark Barcelona á sínum tíma, hefur verið orðaður við Espanyol og gæti farið aftur í sinn gamla heimabæ í janúar.

„Það hvetur mig áfram að valda þeim sem vilja sjá mig spila ekki vonbrigðum,“ skrifaði hann á Twitter-síðu sína í gær. „Ég berst fyrir frelsi mínu svo ég geti notið minnar vinnu.“

Á miðanum sem Valdes er með í hönd sinni stendur: „Það sem ekki drepur mann styrkir mann.“

No defraudar a los que desean volver a verme jugar, mi motivación. Lucho por ser Libre y disfrutar de mi profesión. pic.twitter.com/rhs7tCNofo

— Victor Valdes (@1victorvaldes) November 25, 2015