Van Gaal: Þurfum meiri hraða og sköpunargáfu á vængina

Louis van Gaal, knattspyrnustjóri Manchester United, gæti bætt við fljótum kantmanni þegar janúarglugginn opnar ef marka má orð hans eftir sigurinn á West Bromwich um helgina.

Van Gaal keypti samlanda sinn Memphis Depay fyrir tímabilið sem hefur ollið miklum vonbrigðum, en hinn uppaldi Jesse Lingard hefur komið sterkur inn í síðustu leikjum og staðið sig vel.

Ashley Young spilar meira og minna í bakverði fyrir utan að vera ekkert sérstaklega hraður og þó Antonio Valencia sé fljótur er hann einnig orðinn bakvörður.

„Ég hef sagt það margsinnis áður að við þurfum hraða og sköpunargáfu á vængina,“ sagði Van Gaal eftir sigurinn.

„Þið sjáið að við erum að spila með Jesse Lingard núna sem er ekki fljótasti kantmaðurinn í heiminum og Juan Mata er heldur ekki sá fljótasti.“

„Við verðum að afgreiða þetta vandamál og sjá svo hvernig við getum spilað og hvort við náum meira jafnvægi í okkar leik með fljótari kantmenn,“ sagði Van Gaal.

Einn þeirra leikmanna sem hefur verið orðaður við Manchester United er senegalski vængmaðurinn Sadio Mané hjá Southampton.

„Þetta fer líka allt eftir því hvað við getum keypt. Ég vil kaupa fullt af leikmönnum en það eru bara ekkert allir til sölu,“ sagði Louis van Gaal.