Salford-drengirnir fá annað D-deildarlið í heimsókn

Utandeildarliðið Salford City kom mörgum á óvart þegar liðið sló D-deildarlið Notts County úr leik í enska bikarnum á föstudagskvöld.

Augu margra hafa þó beinst fyrst og fremst að Salford þar sem að félagið er í eigu fimm fyrrverandi leikmanna Manchester United - þeirra Ryan Giggs, Paul Scholes, Nicky Butt, Gary Neville og Phil Neville.

Sjá einnig: Gulldrengir Manchester United keyptu utandeildarfélag

Í kvöld var dregið í aðra umferð bikarkeppninnar og mætir Salford liði Hartlepool, sem einnig leikur í ensku D-deildinni.

Eftir aðra umferð bikarkeppninnar hefst þátttaka úrvalsdeildarliðanna. Ef Salford tekst einnig að bera sigurorð af Hartlepool gæti því Salford fengið enn stærra verkefni í bikarnum snemma á nýju ári.