Segir gagnrýni Mourinho hafa neikvæð áhrif á suma leikmenn Chelsea

Brasilíski bakvörðurinn Felipe Luis, sem spilaði með Chelsea á síðustu leiktíð þegar liðið varð Englandsmeistari, segir að opinber gagnrýni José Mourinho geti haft neikvæð áhrif á suma leikmenn liðsins.

Mourinho er í miklu basli með Chelsea-liðið á þessari leiktíð, en það er búið að tapa sjö af tólf leikjum sínum eftir að standa uppi sem meistari í vor.

Mourinho hefur opinberlega gagnrýnt suma af leikmönnum sínum, þar á meðal Belgann Eden Hazard, sem var besti leikmaður síðasta tímabils, og serbneska miðjumanninn Nemanja Matic.

„Hann fer sínar leiðir þegar hann talar við fjölmiðla, sérstaklega þegar liðið tapar. Það getur haft slæm áhrif á ákveðna leikmenn. Sumir leikmenn græða á gagnrýninni en aðrir gera það alls ekki,“ segir Luis.

Brasilíumaðurinn var keyptur til Chelsea á 18 milljónir punda síðasta sumar en náði aldrei að festa sér byrjunarliðssæti og var sendur aftur til Atlético Madríd eftir tímabilið.

„Stundum hefur Mourinho rétt fyrir sér og stundum ekki,“ segir hann. „Stundum finnst mönnum það sem Mourinho segir alveg út úr korti en stundum eru menn sammála honum. Svona virkar þetta bara. Sjálfum finnst mér þetta eðlilegt,“ segir Felipe Luis.