Wenger: Það geta ekki allir 740 leikmennirnir á HM verið hreinir

Arsene Wenger, knattspyrnustjóri Arsenal í ensku úrvalsdeildinni, óttast að fótboltinn gæti átt við vandamál að stríða hvað varðar árangursbætandi efni í ljósi skandalsins sem upp er kominn í frjálsíþróttunum.

Í viðtali við franska blaðið L'Equipe segist Wenger oft hafa mætt liðum þar sem hann grunar forráðamenn þess um að dæla lyfjum leikmennina.

Bara á þessu tímabili tapaði Arsenal, 2-1, fyrir Dinamo Zagreb í Meistaradeildinni og ein stjarna króatíska liðsins, Arijan Ademi, féll nokkrum vikum síðar á lyfjaprófi.

Sigurvegurum hampað sama hvernig þeir unnu

„Ég reyni að trúa á gildin sem ég tel mikilvæg í þessu lífi og reyni að deila þeim með öðrum. Á 30 árum sem þjálfari hef ég aldrei sprautað neinu í leikmenn mína til að gera þá betri og ég er stoltur af því,“ segir Wenger.

„Fyrir mér er það fallega við íþróttir að allir vilja vinna. Það verður samt bara alltaf einn sigurvegari. Við erum kominn á þann stasð að sigurvegurum er hampað sama hvernig þeir komust á toppinn.“

„Síðan áttum við okkur á því tíu árum seinna að viðkomandi var svindlari og á þeim tíma þjáðist sá sem var í öðru sæti. Hann fékk enga viðurkenningu,“ segir Wenger.

Tölfræðilega ekki hægt

Frakkinn vill að forráðamenn knattspyrnunnar auki lyfjaeftirlitið og standi að frekari rannsóknum til að koma í veg fyrir lyfjamisferli.

„Í sannleika sagt finnst mér við ekki framkvæma nóg af lyfjaprófum. Ég á erfitt með að trúa að 740 leikmenn fari í gegnum heimsmeistarakeppnina án þess að lenda í vandræðum. Tölfræðilega á það ekki að geta gerst,“ segir Wenger.

„Við getum gert betur og kafað dýpra. Ég vona að England sé hreint þegar kemur að þessu en ég veit ekki hvernig staðan er. Ég veit að þegar menn fara í lyfjapróf eftir Evrópuleiki er bara tekið þvagsýni en ekki blóðsýni. Ég hef beðið yfirvaldið margsinnis um að breyta þessu,“ segir Arsene Wenger.