Aguero stóð við stóru orðin

Sergio Aguero eyddi þriðjudeginum í að árita hundruðir treyja með gamla númerinu hans á bakinu.

Aguero hefur verið númer 16 hjá Man. City og stóð til að hann yrði áfram í því númeri. Þá ákvað Man. City að lána Edin Dzeko til Roma og treyja númer 10 var á lausu.

Aguero ákvað að stökkva á hana um leið. Honum fannst það samt leiðinlegt gagnvart þeim sem eiga Aguero-treyju númer 16 og ákvað því að gera eitthvað fyrir fólkið.

Hann bauðst til þess að árita hverja einustu treyju númer 16. Hundruðir stuðningsmanna City tóku þessu fagnandi og komu með treyjuna sína til City.

Aguero eyddi svo öllum þriðjudeginum í að árita treyjurnar með bros á vör. Verðmæti þessara treyja númer 16 varð um leið talsvert meira.

Flott framtak hjá Argentínumanninum.