Varamarkvörður Bournemouth í dag spilaði með Hetti fyrir þremur árum

Ryan Allsop, fyrrverandi markvörður Hattar á Egilsstöðum, er á varamannabekk nýliða Bournemouth sem etja þessa stundina kappi við Southampton í nágrannaslag í ensku úrvalsdeildinni.

Allsop spilaði fyrstu átta leikina með Hetti sumarið 2012 þegar Egilsstaðarliðið var nýliði í 1. deildinni, en Allsop var lang besti markvörður deildarinnar þann tíma sem hann spilaði í henni.

Með Englendinginn í markinu safnaði Höttur 10 af 21 stigi sínu og fékk aðeins á sig að meðaltali 0,75 mörk í leik (6 í 8 leikjum).

Eftir að Allsop fór spiluðu þrír aðrir í marki Hattar í leikjunum fjórtán sem eftir voru og fékk liðið þá 2,35 mörk á sig að meðaltali í leik. Höttur féll á endanum úr deildinni.

Eftir tímabilið með Hetti spilaði Allsop með Leyton Orient en var svo fenginn til Bournemouth. Hann spilaði 20 leiki með liðinu í B-deildinni 2013/2014 áður en hann var svo lánaður til Coventry í C-deildina í fyrra.

Allsop er þriðji markvörður Bournemouth á eftir Pólverjanum Artur Boruc, sem er meiddur, og Ástralanum Adam Federici sem stendur vaktina í marki nýliðanna í dag.