Mahrez nú á innkaupalista Manchester United og PSG

Alsírmaðurinn Rihad Mahrez hefur slegið í gegn með spútnikliði Leicester City í ensku úrvalsdeildinni í vetur. Leicester City er í þriðja sæti deildarinnar eftir ellefu leiki og þessi 24 ára vængmaður á mikinn þátt í því.

Riyad Mahrez skoraði tvö mörk um helgina þegar Leicester City vann 3-2 endurkomusigur á móti West Bromwich Albion á útivelli.

Riyad Mahrez er annar markahæsti leikmaður ensku úrvalsdeildarinnar eftir 11 leiki en hann er með 7 mörk og 4 stoðsendingar í 11 leikjum með Leicester City til þess á tímabilinu.

Nú gæti verið svo að Riyad Mahrez sé orðinn of stór fyrir Leicester City en þegar er byrjað að orða kappann við stórlið.

Blaðamaður France Football hefur heimildir fyrir því að bæði Manchester United og Paris Saint-Germain hafi áhuga á því að kaupa Riyad Mahrez í janúar.

Leicester City vill örugglega ekki selja Riyad Mahrez en það gæti verið erfitt að berjast á móti því þegar svona stórir klúbbar banka á dyrnar og bjóða bæði félagi og leikmanni gull og græna skóga.

Riyad Mahrez er á sínu þriðja tímabili með Leicester City sem keypti hann frá b-deildarliði AC Le Havre í janúar 2014.

Riyad Mahrez hefur þegar skorað jafnmörg deildarmörk á þessu tímabili og á hinum tveimur til samans.