Missti systur sína í miðjum leik

Zenon Stylianides, leikmaður U-21 liðs Tottenham, ákvað að spila með liði sínu á föstudag þó svo að hann vissi að systir hans lægi á dánarbeðinu.

Stylianides er sautján ára gamall og var í byrjunarliðinu er Tottenham vann 3-1 sigur á Chelsea. Þegar tíu mínútur voru liðnar af leiknum lést systir hans, Debi, sem hafði háð baráttu við krabbamein.

„Á leið minni á leikinn fékk ég símtal frá mömmu minni sem sagði að systir mín myndi deyja. Ég er ánægður með að ég talaði við hana,“ skrifaði Stylianides á Twitter-síðu sína.

Hann sagðist meðvitaður um að hann væri að taka áhættu með því að spila leikinn en hann kom þeim skilaboðum til þjálfara síns að hann vildi spila.

„Mamma og pabbi sögðu mér að gera það fyrir Deb. Við unnum fyrir þig. Ég elska þig stórra systir. Hvíl í paradís,“ skrifaði hann enn fremur.

Talsmaður Tottenham sagði við enska fjölmiðla að félagið væri að gera allt sem í valdi þess stendur til að styðja við Stylianides og fjölskyldu hans.

Stylianides hefur verið í knattspyrnuakademíu Tottenham síðan hann var sjö ára gamall og var fluttur úr U-18 liðinu í U-21 liðið eftir góða frammistöðu með fyrrnefnda liðinu á síðustu leiktíð.

pic.twitter.com/r6PtbFZ0no

— zenon stylianides (@zenon19998) October 30, 2015