Megum ekki æsa okkur yfir gagnrýninni

Michael Carrick, miðjumaður Man. Utd, er ekki mikið að æsa sig yfir allri þeirri gagnrýni sem liðið hefur fengið í vetur.

Man. Utd hefur eðlilega verið mikið gagnrýnt í vetur fyrir sinn leik. Mark Rooney í Meistaradeildinni á þriðjudag var til að mynda fyrsta mark félagsins í 404 mínútur.

Paul Scholes, fyrrum miðjumaður félagsins, hefur til að mynda sagt að það vanti alla sköpun í leik liðsins og leikstíllinn sagður vera of varkár og íhaldssamur.

„Það eru svo margar skoðanir þarna úti. Ef maður fer að hafa áhyggjur af því sem sagt er í sjónvarpinu eða blöðunum þá er maður í vandræðum," sagði Carrick.

„Það er ekkert að þessum ummælum. Það þarf að taka því slæma með því góða og sætta sig við gagnrýni."