Gata við Ewood Park nefnd eftir Shearer

Alan Shearer fær nafn sitt á götu við Ewood Park, heimavöll Blackburn, en borgaryfirvöld tilkynntu það í gær.

Shearer var lykilmaður í liði Blackburn sem tryggði sér enska meistaratitilinn fyrir 20 árum síðan en hann skoraði alls 130 mörk í 171 leik á ferli sínum með Blackburn.

„Þetta var afar hamingjusamur tími í mínu lífi,“ sagði Shearer, stoltur af götunni sinni. „Ég mun ávallt líta glaður til þess tíma og fólksins sem gerði hann svo sérstakan.“

Gatan mun bera nafnið Alan Shearer Way framvegis en Blackburn er aðeins eitt fimm félaga sem hafa orðið enskur meistari eftir að úrvalsdeildin var sett á laggirnar árið 1992. Hin eru Manchester United, Arsenal, Manchester City og Chelsea.