Stuðningsmenn eiga að taka gremju sína út á mér

Louis van Gaal, stjóri Man. Utd, segist skilja reiði stuðningsmanna félagsins og segir að þeir eigi að vera reiðir út í hann en ekki leikmenn liðsins.

Það var mikil reiði í stúkunni í leik Man. Utd og CSKA Moskvu í Meistaradeildinni í vikunni. Þá bauluðu stuðningsmennirnir er Anthony Martial var tekinn af velli. Þeir sungu líka að þeir væru Man. Utd og vildu sækja.

„Stuðningsmennirnir verða að styðja leikmennina því annars er verið að gera þeim erfitt fyrir á sínum eigin heimavelli," sagði Van Gaal á blaðamannafundi í dag.

„Gagnrýni frá stuðningsmönnum er aldrei ósanngjörn því þeir eru að túlka tilfinningar sínar. Ég held við verðum að spila fyrir stuðningsmennina. Þeir verða að líka að skilja leikinn og mótspyrnu andstæðinganna.

„Ég get aðeins ráðið þeim að gagnrýna knattspyrnustjórann en ekki leikmennina. Það er erfitt að spila fyrir Man. Utd undir pressu og það er ekki gott fyrir leikmennina að fá ekki stuðning. Þá er betra að blístra á stjórann. Ég ræð við það enda með mikla reynslu á mínum ferli."