Mesut Özil setti met með því að gefa stoðsendingu sjötta leikinn í röð

Mesut Özil varð í dag fyrsti leikmaðurinn í sögu ensku úrvalsdeildarinnar sem gefur stoðsendingu í sex leikjum í röð á einu og sama tímabilinu.

Özil lagði þá upp jöfnunarmark fyrir Kieran Gibbs í 1-1 jafntefli Arsenal á móti Tottenham í Norður-London slagnum.

Özil hefur alls gefið átta stoðsendingar í þessum sex leikjum því í tveimur þeirra hefur hann gefið tvær stoðsendingar.

Özil gaf tvær stoðsendingar í fyrstu fimm leikjum sínum í ensku úrvalsdeildinni á þessu tímabili en frá og með 5-2 sigurleiknum á móti Leicester City 26. september hefur hann lagt upp mark í hverjum leik.

Cesc Fabregas náði einnig að gefa stoðsendingu í sex spiluðum leikjum í röð en í millitíðinni fór hann frá Arsenal til Barcelona og svo aftur til Chelsea sem þýddi að það kom þriggja ára hlé hjá honum.

Sky Sports sagði frá þessu í kvöld og birti jafnframt eftirfarinn lista yfir þá sem hafa gefið stoðsendingar í flestum leikjum í röð.

Stoðsendingar í flestum leikjum í röð í ensku úrvalsdeildinni:

Mesut Özil, Arsenal 2015     6

Cesc Fabregas, Arsenal/Chelsea 2011-2014     6

Antonio Valencia, Manchester United 2011     5

Thierry Henry, Arsenal 2004     5

Ryan Giggs, Manchester United 2003     5

Gianfranco Zola, Chelsea 2002     5

Darren Anderton, Tottenham 1993     5

Mesut Özil hefur lagt upp þessi átta mörk fyrir fjóra leikmenn en hér fyrir neðan má sjá á hverja Özil hefur gefið stoðsendingar í þessum sex síðustu leikjum Arsenal-liðsins. Özil hefur gefið þrjár stoðsendingar á bæði þá Alexis Sánchez og Olivier Giroud.

Stoðsendingamet Mesut Özil:

5-2 sigur á Leicester City

(Stoðsending á Alexis Sánchez (skalli))

3-0 sigur á Manchester United

(Stoðsending á Alexis Sánchez)

3-0 sigur á Watford

(Stoðsendingar á Alexis Sánchez og Olivier Giroud)

 

2-1 sigur á Everton

(Stoðsending á Olivier Giroud (skalli))

3-0 sigur á Swansea City

(Stoðsendingar á Olivier Giroud (skalli) og Joel Campbell)  

1-1 jafntefli við Tottenham

(Stoðsending á Kieran Gibbs)