Coutinho með tvö mörk í fyrsta deildarsigri Klopp | Sjáðu mörkin

Liverpool vann sinn fyrsta deildarleik undir stjórn Jürgen Klopp þegar liðið sótti Chelsea heim í dag. Lokatölur 1-3, Liverpool í vil.

Mörkin úr leiknum má sjá hér að neðan.

Liverpool komst með sigrinum upp í 7. sæti deildarinnar en Chelsea er í tómu rugli í því fimmtánda. Þetta var sjötta tap Englandsmeistaranna í fyrstu 11 umferðunum en José Mourinho, knattspyrnustjóri liðsins, situr í ansi heitu sæti.

Chelsea komst reyndar yfir á 4. mínútu þegar Ramires skallaði fyrirgjöf Cesar Azpilicueta í netið en síðan tók Liverpool yfir leikinn.

Philippe Coutinho jafnaði metin í uppbótartíma fyrri hálfleiks með laglegu marki, sem var hans fyrsta í deildinni síðan í 0-1 sigrinum á Stoke City í 1. umferðinni.

Staðan var 1-1 í hálfleik og fram á 74. mínútu þegar Coutinho skoraði sitt annað mark. Það var svo varamaðurinn Christian Benteke sem gulltryggði sigur Liverpool með sínu fjórða deildarmarki í vetur.

Niðurstaðan 1-3 sigur Liverpool sem er enn ósigrað undir stjórn Klopp.

Chelsea 1-0 Liverpool Chelsea 1-1 Liverpool Chelsea 1-2 Liverpool Chelsea 1-3 Liverpool