Hart gaf mark en Toure tryggði City sigurinn | Sjáðu mörkin

Yaya Touré sá til þess að Manchester City fékk þrjú stig gegn nýliðum Norwich í 11. umferð ensku úrvalsdeildarinnar í dag.

Nicolas Otamendi kom City yfir á 67. mínútu með skalla eftir hornspyrnu Kevin De Bruyne en þetta var fyrsta mark Argentínumannsins fyrir félagið.

Cameron Jerome jafnaði metin á 83. mínútu eftir skelfileg mistök Joe Hart í marki City.

Sex mínútum síðar fékk City vítaspyrnu eftir að Russell Martin, fyrirliði Norwich, varði skot Raheem Sterling með hendinni. Toure fór á punktinn og skoraði sigurmark heimamanna sem fengu aðra vítaspyrnu í uppbótartíma en Aleksandar Kolarov skaut framhjá.

Þetta var fjórða tap Norwich í röð en kanarífuglarnir eru í 16. sæti deildarinnar með níu stig, tveimur stigum frá fallsæti.