Koné með þrennu í stórsigri Everton | Sjáðu mörkin

Arouna Koné skoraði þrennu þegar Everton vann 6-2 sigur á Sunderland í fyrri leik dagsins í ensku úrvalsdeildinni.

Eins og lokatölurnar gefa til kynna var leikurinn bráðfjörugur og mörkunum hreinlega rigndi inn.

Spánverjinn Gerard Deulofeu átti frábæran leik í dag og hann kom Everton yfir á 19. mínútu þegar hann slapp í gegnum vörn Sunderland eftir sendingu Koné sem kom heimamönnum svo í 2-0 á 31. mínútu.

En Sunderland, sem vann 3-0 sigur á Newcastle í síðustu umferð, gafst ekki upp og Jermain Defoe minnkaði í uppbótartíma fyrri hálfleiks. Félagi hans í framlínunni, Skotinn Steven Fletcher, jafnaði svo metin á 50. mínútu.

Þá fóru Everton-menn aftur í gang og þeir komust yfir á ný á 55. mínútu þegar varnarmaðurinn Sebastian Coates setti boltann í eigið mark eftir fyrirgjöf Deulofeu.

Fimm mínútum síðar lagði Deulofeu upp annað mark fyrir Romelu Lukaku og staðan orðin 4-2. Og aðeins tveimur mínútum seinna skoraði Koné fimmta markið og Everton því búið að skora þrjú mörk á sjö mínútum.

Það var svo Koné sem átti lokaorðið þegar hann skallaði frábæra fyrirgjöf Lukaku í netið á 76. mínútu.

Þetta er í fyrsta sinn síðan í nóvember 2007 sem Everton skorar sex mörk eða meira í leik en það gerðist einmitt síðast í 7-1 sigri á Sunderland.

Með sigrinum komst Everton upp í 8. sæti úrvalsdeildarinnar en þetta var fyrsti sigur liðsins í fjórum leikjum. Sunderland er hins vegar í 19. og næstneðsta sæti deildarinnar og ljóst er að Sam Allardyce bíður erfitt verkefni að halda liðinu uppi.

Everton 1-0 Sunderland Everton 2-0 Sunderland Everton 2-1 Sunderland Steven Fletcher jafnar í 2-2: Romelu Lukaku kemur Everton í 3-2: Lukaku skorar annað mark sitt og kemur Everton í 4-2: Arouna Koné kemur Everton í 5-2: Koné fullkomnar þrennuna og Everton kemst í 6-2: